Ólafur Ingi Skúlason hefur verið ráðinn sem þjálfari U21-árs landsliðs karla í knattspyrnu og tekur við af Davíð Snorra Jónassyni sem var ráðinn aðstoðarþjálfari A-landsliðs karla í vor. Ólafur Ingi er því hættur með U19-ára landslið karla, sem hann tók við í janúar 2021 og fór með á Evrópumót síðasta sumar. Þórhallur Siggeirsson mun taka við stjórnartaumunum hjá U19-ára landsliðinu.
Spænski tennisleikarinn Carlos Alcaraz hafði betur gegn Serbanum Novak Djokovic í úrslitaleik Wimbledon-tennismótsins á Englandi í gær. Viðureignin stóð yfir í tvær og hálfa klukkustund og vann Alcaraz 3:0. Þetta var annað árið í röð sem þeir mætast í úrslitaleik Wimbledon en Alcaraz sigraði líka á síðasta ári í hörkuleik sem endaði 3:2. Þetta er fjórði risatitill Alcaraz sem er aðeins 21 árs gamall.
...