Múte Bourup Egede, formaður grænlensku landsstjórnarinnar, heimsótti undir lok síðustu viku vinnslusvæði Amaroq Minerals við Nalunaq-gullnámuna á Suður-Grænlandi og kynnti sér framvindu framkvæmda á svæðinu. Grænlensk stjórnvöld samþykktu undir lok síðasta mánaðar umhverfis- og samfélagsmat fyrir námuna, en vinnsla mun hefjast á þessu ári.
Eldur Ólafsson, forstjóri og stofnandi Amaroq, tók á móti Egede og fór með honum um svæðið.
Amaroq býr yfir námuvinnsluréttindum á landi sem hefur að geyma verulegt magn af gulli í jörðu auk annarra verðmætra málma á Suður-Grænlandi. Undir lok síðasta árs tilkynnti félagið um aukna gullleitarmöguleika á Nanortalik-gullbeltinu, þar sem starfræktar eru nokkrar námur.