„Ég bara fagna umræðunni, að þessi færsla hafi verið birt, en það hefði verið hægt að gera það með jákvæðari tón,“ segir Hlynur Einarsson, íbúi í stúdentagörðunum Sögu. Teitur Atlason, íbúi í Vesturbæ Reykjavíkur, birti færslu á Facebook-hópi Vesturbæinga um að sorp væri á víð og dreif á afgirtu svæði fyrir utan stúdentagarðana. Gagnrýndi hann umgengni íbúa Sögu.
Hlynur lýsir því í samtali við Morgunblaðið að honum hafi fundist hann knúinn til að mótmæla alhæfingum Teits um að allir stúdentar séu sóðar. Hann hafi viljað verja stúdenta og koma því á framfæri að sóðaskapurinn væri ekki þeim að kenna.
„Þetta er í umsjá Reykjavíkurborgar og þau eru bara ekki að koma nógu oft, sem náttúrulega veldur miklum sóðaskap,“ segir hann og nefnir að íbúarnir hafi borið málið undir Félagsstofnun stúdenta en fengið þau svör að FS annist þrif í kringum svæðið en Reykjavíkurborg hirði sorp.
...