Aerosmith aflýsir kveðjutónleikaferð sinni

Hljómsveitarmeðlimir Aerosmith tilkynntu um helgina að þeir væru hættir við kveðjutónleikaferð sveitarinnar vegna raddmeiðsla forsöngvarans, Stevens Tyler. Þessu greinir CBS News frá. Í yfirlýsingu frá sveitinni kemur fram að rödd Tylers sé hljóðfæri engu öðru líkt. „Hann hefur mánuðum saman sleitulaust unnið að því að koma rödd sinni í það form sem hún var í áður en hann hlaut meiðslin. Því miður hefur nú komið í ljós að það er ógjörningur. Af þeim sökum höfum við tekið þá erfiðu og sorglegu en nauðsynlegu ákvörðun að aflýsa tónleikaferðinni.“ Í frétt CBS News er rifjað upp að Tyler hafi hlotið meiðsli á raddböndum sínum í september í fyrra og af þeim sökum hafi þurft að fresta kveðjutónleikaferð sveitarinnar.