Hollendingurinn Joshua Zirkzee var hetja Manchester United er liðið hafði betur gegn Fulham, 1:0, í upphafsleik ensku úrvalsdeildarinnar í fótbolta á Old Trafford í Manchester í gærkvöldi.
Zirkzee, sem kom til United frá Bologna í sumar, kom inn á sem varamaður á 61. mínútu og skoraði sigurmarkið á 87. mínútu eftir sendingu frá Alejandro Garnacho, sem einnig kom inn á sem varamaður á sama tíma.
Deildin heldur áfram í dag er sex leikir fara fram. Liverpool heimsækir nýliða Ipswich í leik sem hefst klukkan 11.30. Er um fyrsta leik Ipwsich í efstu deild í 22 ár að ræða.
Þá mætir Arsenal, sem endaði í öðru sæti á síðustu leiktíð, Wolves á heimavelli. Er mikilvægt fyrir Arsenal að byrja vel, ef liðið ætlar sér að eiga möguleika í ríkjandi meistara, Manchester City, í lok tímabils.