![Vinsælt er að taka þátt í hlaupinu.](/myndir/gagnasafn/2024/08/23/d6de5a89-b4da-4838-a0c3-a4d2a70fd656.jpg)
Þorsteinn V. Jónsson, veðurfræðingur á Veðurstofu Íslands, ráðleggur þeim sem taka vilja þátt í Menningarnótt að klæða sig vel og hafa bæði vettlinga og húfu meðferðis. Segir hann von á „þokkalega björtu veðri“ yfir daginn en kólnandi veðri með kvöldinu. Mun hiti að líkindum detta niður í fimm til sex gráður.
„Það verður þokkalega bjart veður, hálfskýjað og bjart með köflum. Fínasta veður þannig lagað séð. Hitinn fer samt ekki mikið yfir tíu eða ellefu stig þegar best lætur,“ segir Þorsteinn og bætir við að hiti muni svo falla talsvert hratt með kvöldinu.
„Það verður ákveðin norðanátt, í kringum fimm til tíu metrar á sekúndu. Það gæti orðið svolítið hvasst við Sæbrautina og úti á Seltjarnarnesi,“ segir hann, en hlauparar munu einmitt fara þá leið. Þá mun draga úr vindi þegar líður á daginn.