Franski kvikmyndaleikarinn og alþjóðlega kyntáknið Alain Delon lést á dögunum, 88 ára gamall, eftir að hafa barist við heilsuleysi í nokkurn tíma. Hann gerðist svissneskur ríkisborgari árið 1999 en lést í Frakklandi.
Ferill Delons á kvikmyndatjaldinu spannaði sex áratugi og hann lék í tæplega hundrað myndum. Hann vann með heimsfrægum leikstjórum á borð við Luchino Visconti, Jean-Luc Godard, Michelangelo Antonioni og Louis Malle og hlaut margvísleg verðlaun á ferlinum.
Á hvíta tjaldinu var yfir honum ákveðin dulúð og depurð, sem gerði að verkum að hann virtist ætíð nokkuð fjarlægur. Hann öðlaðist heimsfrægð fyrir leik sinn í myndum Viscontis, Rocco og bræður hans og Hlébarðinn, og vakti mikila hrifningu í myndinni Le Samourai sem Jean-Pierre Melville leikstýrði þar sem hann lék leigumorðingja.
...