Helgi Snær Sigurðsson
helgisnaer@mbl.is
Rapparinn Kött Grá Pjé, réttu nafni Atli Sigþórsson, er snúinn aftur með breiðskífu, Dulræna atferlismeðferð, sem hefur að geyma mikinn fjölda laga og stuttra hljóðbúta. Plötuna vann hann í samstarfi við félaga sinn Fonetik Simbol, en sá heitir réttu nafni Helgi Pétur Lárusson.
Atli er fæddur árið 1983 og er því með eldri mönnum í íslensku rappi. Er hann kannski orðinn öldungur í greininni? „Jú, jú, jú, biddu fyrir þér, og var það þegar ég byrjaði aftur að rappa í rauninni, á sínum tíma. Þá var ég að verða þrítugur. Ég hef nefnilega hætt þessu margoft, var í þessu þegar ég var unglingur og í kringum tvítugt, svo hætti ég og fór að gera aðra hluti. Byrjaði svo aftur þegar ég var að nálgast þrítugt og þá er maður nú kominn á síðasta snúning í rappgeiranum,“ svarar Atli kíminn.