![Umbra Lilja Dögg, Guðbjörg Hlín, Arngerður María og Alexandra Kjeld.](/myndir/gagnasafn/2024/08/31/c719522d-73f1-4f00-ab3b-031181596263.jpg)
Umbra fagnar 10 ára starfsafmæli með tónleikum sem bera yfirskriftina „Ómur aldanna“ í Norðurljósum Hörpu á morgun, sunnudag, kl. 16, en tónleikarnir eru hluti af tónleikaröðinni Sígildir sunnudagar.
„Tónlist fyrri alda verður í algleymingi í einstökum útsetningum bandsins sem allt frá fyrstu tíð hefur lagt áherslu á að skapa sinn eigin hljóðheim óhindrað og af einlægni. Tónleikagestir verða leiddir í gegnum ferðalag þar sem mætast pílagrímar og farandsveinar, drykkju- og maríusöngvar, kóngafólk og heimasætur. Enn fremur verður flutt glæný tónlist sem hljómsveitin vinnur nú að út frá fornum erindum Völuspár,“ segir í tilkynningu.
Umbru skipa þær Arngerður María Árnadóttir, Alexandra Kjeld, Guðbjörg Hlín Guðmundsdóttir og Lilja Dögg Gunnarsdóttir. Þær verða á faraldsfæti í haust og vetur, en Umbra er á leið í tónleikaferðalag til Kína, Frakklands, Indlands og Þýskalands.