Sveindís Jane Jónsdóttir landsliðskona í knattspyrnu og liðsfélagar hennar í Wolfsburg máttu þola tap gegn Roma, 1:0, í fyrstu umferð A-riðils Meistaradeildar Evrópu í Rómarborg í gærkvöldi.
Sveindís Jane var í byrjunarliði Wolfsburg en var tekin af velli í hálfleik. Lyon og Galatasaray eru einnig í A-riðli og mættust í Frakklandi í gærkvöldi. Fór svo að Lyon vann þægilegan sigur, 3:0.
Betur fór hjá annarri landsliðskonu, Amöndu Andradóttur, og liðsfélögum hennar í Twente. Hollensku meistararnir heimsóttu Skotlandsmeistara Celtic til Glasgow og unnu góðan sigur, 2:0, í B-riðli.
Amanda var í byrjunarliði Twente og fór af velli á 86. mínútu. Kayleigh van Dooren skoraði bæði mörk Twente.
Í hinum leik riðilsins mættust Chelsea og Real Madríd í Lundúnum þar sem heimakonur unnu 3:2.