Litskrúðug og fjölbreytt flóra Íslands er meginviðfangsefni listar Eggerts Péturssonar. Hann er þekktur fyrir margbrotin málverk af blómum og jurtum sem hafa skapað honum sérstöðu innan íslenskrar myndlistar. Áhuga Eggerts á blómum má rekja til barnæsku, þegar hann tíndi blóm og þurrkaði. Hann teiknaði myndir í bókina Íslensk flóra með litmyndum eftir Ágúst H. Bjarnason á árunum 1982–1983 en það ýtti enn frekar undir áhuga hans á íslenskum plöntum.
Málverk Eggerts eru þaulhugsuð og nákvæm vinnubrögðin gera það að verkum að auðveldlega má greina ákveðnar blómategundir í verkunum sem mynda gjarnan þétta breiðu. Sjónarhornið er afmarkað, líkast því að horft sé ofan í svörðinn. Hann málar blómin í raunstærð og raðar þeim á myndflötinn eftir ákveðnu kerfi, eftir ættum, stöðum eða landslagi, litum eða heitum blómanna. Hann á það þó til að rugla áhorfandann í ríminu þegar hann tekur
...