Matthildur Rósenkranz Guðmundsdóttir, eða Lóló Rósenkranz, fæddist 24. október 1949 í Reykjavík. „Það er himinn og haf á milli Matthildur og Lóló, en Lóló hef ég verið kölluð frá fæðingu, upphaflega af föðursystur minni og er ánægð með það gælunafn og í reynd skírnarnafnið líka.“
Lóló er alin upp í miðbæ Reykjavíkur, nánar tiltekið á Hverfisgötu og Laugavegi. Hún gekk í Austurbæjarskóla og gagnfræðaskóla Austurbæjar. „Ræturnar mínar liggja fastar í miðbæ Reykjavíkur. Ég kom heim úr fyrsta íþróttatímanum í sjö ára bekk og tjáði foreldrum mínum að ég ætlaði að verða íþróttakennari þegar ég yrði stór. Í minningunni opnaðist eitthvað stórkostlegt fyrir mér þegar ég kom inn í íþróttasalinn í þessum fyrsta tíma. Þar með var ákvörðunin tekin og henni varð ekki haggað. Pabbi hafði þegar lagt grunninn með tíðum ferðum í sund, á skíði og á
...