„Þetta var ólýsanleg tilfinning,“ sögðu fimleikakonurnar og Evrópumeistararnir Guðrún Edda Sigurðardóttir og Helena Clausen Heiðmundsdóttir í Dagmálum. Kvennalið Íslands í hópfimleikum fagnaði sigri á Evrópumótinu í Bakú í Aserbaídsjan…
Hópfimleikar Guðrún Edda og Helena Clausen eru Evrópumeistarar.
„Þetta var ólýsanleg tilfinning,“ sögðu fimleikakonurnar og Evrópumeistararnir Guðrún Edda Sigurðardóttir og Helena Clausen Heiðmundsdóttir í Dagmálum.
Kvennalið Íslands í hópfimleikum fagnaði sigri á Evrópumótinu í Bakú í Aserbaídsjan um síðustu helgi en liðið fékk 53.850 stig, 0,450 stigum meira en Svíþjóð. Þetta var í fjórða sinn sem kvennalandslið Íslands í hópfimleikum verður Evrópumeistari en liðið varð síðast Evrópumeistari árið 2021 í Guimaraes í Portúgal.
„Við horfðum stjarfar á stigatöfluna. Það eina sem við vorum að hugsa var hvort við myndum lenda í öðru sæti eða fara upp fyrir Svíþjóð,“ sagði Helena. „Ég fæ enn þá titringinn yfir mig þegar ég hugsa um þetta augnablik,“ bætti Guðrún Edda við.