Félag íslenskra bifreiðaeigenda (FÍB) áætlar að upptaka kílómetragjalds á ökutæki og skattabreytingar á eldsneyti því samhliða ættu að lækka núverandi útsöluverð á bensínlítra um ríflega 95 krónur og útsöluverð á dísilolíulítra um 77 krónur.
Þetta kemur fram í umsögn félagsins um frumvarp sem efnahags- og fjármálaráðherra hefur lagt fram á Alþingi um kílómetragjald.
Segir félagið að útsöluverð á bensíni á ódýrustu stöðvunum gæti því verið í kringum 190 krónur á lítra miðað við núverandi heimsmarkaðsverð. Á dýrari afgreiðslustöðvum gæti verðið verið í kringum 220 krónur á lítra. Útsöluverð á dísilolíu miðað við núverandi heimsmarkaðsverð og álagningu olíufélaganna á hvern lítra ætti að fara um og undir 215 krónur á ódýrari afgreiðslustöðvum og undir 240 krónur á lítra á dýrari afgreiðslustöðvum.
Í umsögninni segir að tryggja þurfi jákvæð verðlagsáhrif olíuverðslækkunar sem myndi hafa veruleg áhrif til lækkunar verðbólgu. „Fyrirsjáanleg
...