Valur og FH máttu þola tap í lokaumferðinni í riðlakeppni Evrópudeildar karla í handbolta í gærkvöldi. Þau léku samanlagt 12 leiki í riðlakeppninni. FH vann einn leik og tapaði fimm á meðan Valur gerði tvö jafntefli og tapaði fjórum
Reynslubolti Ásbjörn Friðriksson fyrirliði FH sækir að Jeremy Robert úr Toulouse í leik liðanna í Evrópudeildinni í Kaplakrika í Hafnarfirði í gær.
— Morgunblaðið/Arnþór
Evrópudeildin
Jóhann Ingi Hafþórsson
johanningi@mbl.is
Valur og FH máttu þola tap í lokaumferðinni í riðlakeppni Evrópudeildar karla í handbolta í gærkvöldi. Þau léku samanlagt 12 leiki í riðlakeppninni. FH vann einn leik og tapaði fimm á meðan Valur gerði tvö jafntefli og tapaði fjórum. Bæði lið voru úr leik fyrir leikina í gær.
FH fékk franska liðið Toulouse í heimsókn í Kaplakrika. Frakkarnir voru með yfirhöndina allan tímann og unnu að lokum fjögurra marka sigur, 29:25.
Toulouse náði mest átta marka forskoti en FH-ingar gerðu virkilega vel í að minnka muninn í tvö mörk, 27:25, þegar tvær mínútur voru eftir. Franska liðið skoraði hins vegar tvö síðustu mörkin og fór með stigin tvö aftur heim til Toulouse.
...