Alec Baldwin vill ekki sjá lokaútkomu Rust

Stórleikarinn Alec Baldwin hefur greint frá því að hann langi ekki til að sjá lokaútkomu kvikmyndarinnar Rust en myndin var frumsýnd ytra á dögunum.

Variety greinir frá því að rúmum þremur árum eftir að kvikmyndatökumaðurinn Halyna Hutchins lést eftir að hafa orðið fyrir voðaskoti á tökustað myndarinnar vonist Baldwin til að geta loks lagt harmleikinn að baki.

„Þetta er augljóslega það erfiðasta sem ég hef gengið í gegnum á ævinni,“ er haft eftir Baldwin. „Fyrir utan fórnarlömbin sjálf er það sem mér finnst sárast hvað þetta gerði konunni minni. Við erum núna að reyna að fá vindinn aftur í seglin og reyna að komast burt frá þessu öllu saman því myndin stendur ekki undir sér sjálf, hún mun alltaf falla í skuggann af þessu atviki.“