Giftir óttast gripinn mest

Vísnagáta liðinnar viku barst sem endranær frá Páli Jónassyni í Hlíð á Langanesi og var svohljóðandi:

Giftir óttast gripinn mest,

geymir tvinna' og víða sést,

hækkar spennu hratt og best

hér á sandi liggja flest.

Eins og vísnaáhugamenn þekkja felst merking lausnarorðsins í hverri línu vísnagátunnar. Helgi Einarsson fann lausnina, sem birtist með kaffisopanum.

Ógn af kökukefli er.

Keflið einnig tvinna ber.

Strauminn keflið höndlar hér.

Úr hafi' á ströndu keflið fer.