Kansas City Chiefs leikur til úrslita í Ofurskálarleiknum í ruðningi árið 2025 eftir nauman sigur gegn Buffalo Bills í úrslitum Ameríkudeildarinnar í fyrrinótt.
Leiknum lauk með sigri Kansas City, 32:29, en Patrick Mahomes, leikstjórnandi Kansas City, skoraði tvö snertimörk í leiknum og fór fyrir sínu liði.
Kansas City mætir Philadelphia Eagles í Ofurskálarleiknum en Philadelphia vann öruggan sigur gegn Washington Commanders í úrslitaleik Þjóðardeildarinnar, 55:23.
Liðin mættust einnig í úrslitum árið 2023 þar sem Kansas City hafði betur, 38:35, í frábærum leik.
Þetta verður sjötti úrslitaleikur Kansas City á síðustu sjö árum en liðið hefur fagnað sigri í Ofurskálarleiknum undanfarin tvö ár og gæti því orðið meistari þriðja árið í röð, sem engum hefur tekist áður.
Leikurinn fer fram sunnudaginn 9. febrúar í New Orleans.