Sagnfræðingafélag Íslands heldur fund í Þjóðarbókhlöðunni í kvöld, miðvikudagskvöldið 5. febrúar, kl. 19.30 undir yfirskriftinni Brautryðjendur í hópi kvenna, að því er kemur fram á facebooksíðu viðburðarins. Þar segir jafnframt að til máls taki þær Auður Eir Vilhjálmsdóttir, sem var fyrst kvenna til að vígjast til prests, sagnfræðingurinn Kristín Svava Tómasdóttir, Rakel Adolphsdóttir, sagnfræðingur og fagstjóri Kvennasögusafnsins, og Sigríður Jónsdóttir, sérfræðingur á Leikminjasafninu.
„Í ár eru 50 ár liðin frá kvennaárinu 1975 og hafa ýmis samtök blásið til nýs kvennaárs af því tilefni. Sagnfræðingafélagið lætur ekki sitt eftir liggja og rifjar á þessum viðburði upp líf og störf nokkurra kvenna sem ruddu brautir í íslensku samfélagi á 20. öld.“