![](/myndir/gagnasafn/2024/07/08/52824b28-8215-41ee-8387-401fc7aa6f83.jpg)
— Morgunblaðið/Kristinn Magnússon
Framkvæmdir standa nú yfir vegna endurgerðar svæðisins við Hlemm. Sem kunnugt er hefur biðstöð Strætó verið flutt á Skúlagötu meðan á þessum framkvæmdum stendur og veitir ekki af enda er svæðið sundurgrafið eins og sjá má á myndinni. Skipta þarf um lagnir og leggja nýtt yfirborð á kaflanum frá Rauðarárstíg við gömlu gasstöðina og yfir gatnamót Laugavegar og Rauðarárstígs. Stefnt er að því að þessum hluta framkvæmda á svæðinu ljúki eftir eitt ár, sumarið 2025, að því er segir á vef Reykjavíkurborgar. Þegar svæðið tekur á sig endanlega mynd verður Klyfjahestur Sigurjóns Ólafssonar fluttur af sínum stað á nýja svæðið nær mathöllinni.