![Mærudagar Góð stemning var á Mærudögum á Húsavík um helgina. Aðaldagur hátíðarinnar var á laugardaginn og lék veðrið við gesti á bryggjunni.](/myndir/gagnasafn/2024/07/29/4a4a0177-dff6-4974-9697-5092e9baf85f.jpg)
Húsvíkingar héldu bæjar- og fjölskylduhátíðina Mærudaga um helgina. Aðalhátíðin var á laugardaginn og voru matarvagnar og tívolí á bryggjunni.
„Bryggjan var troðfull af fólki að eiga skemmtilega stund saman. Hún bara nötraði af góðum takti og stemningu á laugardaginn þar sem fólk söng, dansaði og hafði gaman saman,“ segir Guðrún Huld Gunnarsdóttir framkvæmdastjóri hátíðarinnar.
Á laugardagskvöldið fóru fram Mærutónleikarnir. Birgitta Haukdal, Birnir, Einar Óli og hljómsveitin Færibandið voru meðal þeirra sem komu fram.
Á lokadegi hátíðarinnar í gær var Mærudagshlaupið haldið, en það fer þannig fram að börn hlaupa á milli húsagarða sem merktir eru með hvítri veifu til að fá mæru í poka, en mæra er gamalt íslenskt orð fyrir sælgæti. herdís@mbl.is