Enginn komst lífs af þegar farþegaflugvél með 61 um borð brotlenti í íbúðahverfi í borginni Vinhedo í São Paulo-ríki í Brasilíu í gær. Flugvélin, sem var á vegum flugfélagsins VoePass, var á leið frá Cascavel í suðurhluta Parana-ríkis til alþjóðaflugvallarins í São Paulo-ríki. Alls voru 57 farþegar um borð ásamt fjögurra manna áhöfn. Ekki liggur fyrir hvað kann að hafa orsakað slysið.
Á myndskeiðum sem birt voru á netmiðlum mátti sjá vélina hringsnúast er hún hrapaði til jarðar. Skömmu eftir brotlendingu steig upp mikill og svartur reykmökkur frá slysstaðnum.
Mikill viðbúnaður var á vettvangi, þar á meðal voru slökkviliðsmenn, herlögregla og almannavarnayfirvöld í Brasilíu.