Snædís Björnsdóttir
snaedis@mbl.is
„Okkur langaði til þess að skapa fleiri tækifæri fyrir ungt fólk til að spila kammertónlist saman,“ segir Geirþrúður Anna Guðmundsdóttir sellóleikari í samtali við Morgunblaðið um kammertónlistarhátíðina Klassík á Eyrinni sem haldin verður í fyrsta sinn um næstu helgi, dagana 17.-18. ágúst. Á hátíðinni, sem fer fram á Norðurlandi, leika ungar íslenskar tónlistarkonur uppáhaldsverk kammerbókmenntanna, allt frá Bach og Beethoven til nútímans, eins og segir í fréttatilkynningu.
Geirþrúður er ásamt Sólveigu Steinþórsdóttur fiðluleikara stofnandi hátíðarinnar, en þær hafa verið vinkonur lengi. „Þetta er í raun gamall tónlistarvinskapur. Við höfum þekkst frá því að við vorum litlar og spilað saman allt frá því að við vorum settar saman í strengjakvartett
...