Ljósmyndarinn Eva Ágústa Aradóttir opnar sýninguna Hinsegin – einhverf í Skoti Ljósmyndasafns Reykjavíkur á laugardag, 24. ágúst, kl. 17. Þar verður til sýnis safn mynda sem Eva Ágústa tók af einstaklingum sem eru hinsegin og staðsetja sig á einhverfurófi, með eða án einhverfugreiningar. Eva Ágústa, sem sjálf er trans og á einhverfurófi, hefur undanfarin ár einbeitt sér að því að segja sögur af fólki út frá sínum hugmyndum um það, segir í tilkynningu.
„Frá unga aldri hefur hún fylgst með því hvernig óeinhverfir haga sér í samfélaginu og út frá því hefur hún reynt að breyta hegðun sinni til þess að passa betur inn í samfélagið. Einhverfir verða gjarnan utanveltu vegna skynjunar sinnar á umhverfinu. Í dag notar Eva þessa óhefðbundnu skynjun sem styrkleika í myndsköpun sinni.“ Eva lærði ljósmyndun í Tækniskólanum í Reykjavík árið 2009 og lauk sveinsprófi 2011.
Sýningin stendur til 3. nóvember 2024.