![Næring Fólk á öllum aldri spókaði sig í miðborginni og naut bæði menningarinnar og ýmissa girnilegra veitinga. Húfa og hamborgari var málið.](/myndir/gagnasafn/2024/08/26/980203b4-06ba-4e37-a689-7fb710cd1bc4.jpg)
Miðborg Reykjavíkur iðaði af lífi á laugardag er Menningarnótt fór fram. Í mörg horn var að líta þegar ljósmyndari Morgunblaðsins var á ferðinni.
Dagurinn hófst á Reykjavíkurmaraþoni Íslandsbanka þar sem José Sousa frá Portúgal kom fyrstur í mark í karlaflokki og Anca Irina Faiciuc frá Rúmeníu fyrst í kvennaflokki.
Í heildina tóku um 14.000 manns þátt í hlaupinu en boðið var upp á fjórar vegalengdir.
Hátíðin var svo formlega sett í Hjartagarðinum á hádegi. Mikið annríki var hjá borgarstjóranum Einari Þorsteinssyni sem ræsti bæði út maraþonið um morguninn og setti hátíðina.
Á Ingólfstorgi var mikið dansstuð þegar Dansskóli Brynju Péturs stóð fyrir tveimur sýningum. Gestir fylgdust áhugasamir með og gæddu sér á ýmiskonar veitingum.
Hátíðinni lauk svo með hefðbundnum hætti á Arnarhóli um kvöldið þar sem margir þekktustu tónlistarmenn þjóðarinnar komu fram og flugeldum var skotið á loft.