Leikarinn Arnmundur Ernst Backman er nú að stíga fyrstu spor sín sem tónlistarmaður, en hann hefur undanfarin ár samið lög og texta. Nú vill hann leyfa öðrum að njóta á tónleikum næstkomandi fimmtudag. Hann vill með tónlist sinni skapa rými fyrir áhorfendur til að leita inn á við og dvelja í augnablikinu og eilífðinni.
„Fyrir nokkrum árum fór tónlistin að kalla meira og meira á mig. Fyrir ári fór ég svo að semja texta, ljóð og tónlist. Ég sem á gítar þó að ég sé í sjálfu sér enginn gítarleikari en hef verið að koma út úr skápnum með það í rólegheitum,“ segir Arnmundur.
„Tónlistin mín er í anda þjóðlaga- og kántrítónlistar. Aðaláhersla mín er á textasmíðina, en textarnir fjalla um þessa stóru vendipunkta í lífinu og mín hjartans mál. Ég er að stíga út í óvissuna,“ segir hann.
...