Andrés Halldór Þórarinsson fæddist 3. september 1949. Hann segir þannig frá:
„Ég ólst upp í Hlíðunum í Reykjavík. Þar var alltaf líf og fjör; kofabyggingar, dúfur, hasarleikir, snjókast og leikið hver hjá öðrum. Sumardvöl hjá Helgu móðursystur á Hafragili í Skagafirði og Sveini manni hennar, svo og sumarbúðir KFUM í Vatnaskógi mörkuðu spor í hugann til góðs. Ég bar út Vísi síðdegis og síðar Morgunblaðið árla morguns á undan skóla kl. 8. Í frítímum vann ég í verslun afa, Klæðaverslun Andrésar Andréssonar, sem sendill og pressari, við afgreiðslu og hvaðeina. Skátastarf tók allan hugann, ég byrjaði 7 ára sem ylfingur í Birkibeinadeildinni í skátaheimilinu við Snorrabraut og varð síðar í foringi og dróttskáti í skátafélaginu Dalbúum á Dalbraut. Og Ásta mín var dróttskáti í Garðbúum og þar sá ég hana. Þetta var afar góður tími og enn eru þeir sem ég kynntist þar mínir bestu vinir.
...