![Hálslón Enn vantar rúma þrjá metra upp á að Hálslón við Kárahnjúka fyllist. Í fyrra fór lónið á yfirfall í lok júlí.](/myndir/gagnasafn/2024/09/06/94d3c372-01cc-4fde-ba34-24936fa1eedc.jpg)
Hálslón Enn vantar rúma þrjá metra upp á að Hálslón við Kárahnjúka fyllist. Í fyrra fór lónið á yfirfall í lok júlí.
— Morgunblaðið/Sigurður Bogi
Baksvið
Sigtryggur Sigtryggsson
sisi@mbl.is
Staða miðlunarlóna Landsvirkjunar á hálendinu er sögulega lág núna í sumarlok. Þar á bæ binda menn vonir við að haustlægðirnar skili sér duglega í lónin. Engin ákvörðun hefur verið tekin um takmarkanir á orkuafhendingu næsta vetur eins og Landsvirkjun þurfti að grípa til síðasta vetur.
„Vatnshæðin er undir meðaltali á öllum þremur miðlunarsvæðum og er staðan í Þórisvatni sérstaklega slök, en það hefur ekki staðið eins lágt á þessum árstíma síðan stífluhæð þess var hækkuð um tvo metra árin 2001/2002 og er það nú rúmum fimm metrum frá yfirfallshæð,“ segir í skriflegu svari Þóru Arnórsdóttur, forstöðumanns hjá Landsvirkjun, við
...