Myndir af sætum dýrum minnka lystina á kjöti

Niðurstöður nýrrar rannsóknar benda til þess að konur sem skoða myndir af sætum dýrum borði minna kjöt og hafi minni lyst á því. Rannsóknin fór fram í háskólanum í Lancaster í Bretlandi þar sem þátttakendum voru sýndar myndir af kálfum, lömbum, grísum og kengúru-ungum og lyst þeirra á kjöti síðan könnuð. 

Bæði körlum og konum fannst dýrin sæt og fundu fyrir kærleik og væntumþykju í garð þeirra. Þessar tilfinningar höfðu þó mismunandi áhrif á karla og konur því að konur greindu frá mun minni lyst á kjöti en karlar eftir að hafa skoðað myndirnar. 

Rannsóknin var leidd af sálfræðingunum dr. Jared Piazza og dr. Neil McLatchie en hugmyndina fengu þeir frá dýraverndarsinnum. Dýraverndarsamtök nota oft myndir af dýrum í herferðum sínum, en engar rannsóknir hafa verið gerðar hingað til á því hvort það hafi einhver áhrif. Þetta eru því góðar fréttir fyrir dýraverndarsinna. Ef þig langar að hætta borða kjöt, prófaðu að skoða myndir af sætum dýrum og sjáðu hvað gerist.

Myndir af sætum dýrum minnka löngun kvenna í kjöt. mbl.is/ThinkstockPhotos

• Blogga um frétt