Árið 2018 var gott heimilisár. Fólk kepptist við að fegra híbýli sín eins og enginn væri morgundagurinn. Auðvitað er smekkurinn misjafn en hér eru nokkur atriði sem gerðu allt vitlaust 2018.

Hringlaga speglar gerðu allt vitlaust. Þessi er í íbúð sem hönnuð var af HAF Studio. Ljósmynd/Gunnar Sverrisson

Hringlaga speglar

Það var enginn maður með mönnum nema eiga hringlaga spegil. Helst átti spegillinn að vera reyklitaður, bronslitaður eða bleikur. Í Módern er hægt að fá hringlaga spegla í nokkrum útgáfum en það er líka hægt að láta sérpanta þá í fyrirtækjum eins og Glerborg.

Þetta bastljós fæst í IKEA.

Bastið með kombakk

Bast þótti mjög töff á áttunda og níunda áratugnum. Fólk keypti sér baststóla með risabaki, hillur og bastborð. Lengi vel var ekki hægt að nálgast þetta nema heppnin væri með fólki á nytjamörkuðum eða antiksölum. Árið 2018 breyttist þetta. Bastið hélt innreið sína og birtist í alls konar myndum. Basthúsgögn hafa marga góða kosti. Þau eru til dæmis umhverfisvæn í framleiðslu því efniviðurinn þarf ekki mikla vökvun. Þeim sem er annt um umhverfið velja bastið fram yfir annan efnivið.

Flauelið var mjög vinsælt árið 2018.

Flauel

Flauel er mjög seventís-legt en árið 2018 varð það mun eftirsóttara en oft áður. Bláir flauelssófar fóru að seljast betur. Einnig hafa flauelspullur verið áberandi og flauelspúðar. Sannleikurinn er samt sá að þótt flauelið hafi verið áberandi 2018 mokaðist það ekkert út úr verslunum. Praktíska fólkið kaupir sér nefnilega ekki flauel heldur fer í ullarefni eða leður.

Plöntur hafa sjaldan verið vinsælli. Þessar eru úr IKEA. Ljósmynd/IKEA

Plöntur

2018 var árið þar sem annar hver maður fékk græna fingur. Plöntur út um allt gerir heimilið hlýlegt og bætir líka loftgæðin á heimilinu. Það þarf bara að muna að vökva og hugsa um hverja plöntu eins og afkvæmi. Þá blómstrar plönturæktin sem aldrei fyrr.

Eggið eftir Arne Jacobsen flokkast sem klassísk hönnun. Hér er það á heimili Rutar Káradóttur innanhússarkitekts. Ljósmynd/Gunnar Sverrisson

Klassísk hönnun

Þótt margt nýtt hafi komið fram þá toppar ekkert klassíska hönnun Arne Jacobsen, Louis Poulsen, Borge Mogensen, Vitra og Minotti. Vönduð og góð hönnun er góð fjárfesting því hún heldur verðgildi sínu og hana er hægt að selja aftur ef í harðbakka slær. Fólk virtist vera nokkuð meðvitað um þetta 2018.

Vinsældir plakata minnkuðu og fólk vildi frekar listaverk.

Plaköt viku fyrir alvörulist

Fyrir nokkrum árum var mikil plakatatíska. Þessi tískustraumur dó árið 2018 en þá kaus fólk frekar að eyða meiri peningum í verk eftir alvörulistamenn, ekki fjöldaframleidd plaköt. Þetta sýndi sig best á Ásmundarsafni fyrir jólin þar sem verkin runnu niður af veggjunum jafnóðum og þau voru hengd upp.

Marmari var vinsæll á árinu 2018. Hér er eldhús sem hannað var af Hönnu Stínu. Ljósmynd/Gunnar Sverrisson

Marmari gerði allt vitlaust

Marmarinn hefur sjaldan verið vinsælli en hann var 2018 og mun hann halda áfram að vera vinsæll. Lengi vel var það bara ljós marmari sem átti upp á pallborð hjá fólki en árið 2018 sást meira af gráum, grænum og svörtum marmara í bland við arabískan marmara sem er brúnleitur. Ef fólk splæsti ekki í marmaraborðplötu þá festi það kaup á skrautmunum úr marmara eins og brettum, bökkum og kertastjökum.

Sæbjörg Guðjónsdóttir innanhússhönnuður gerði fallegt litakort fyrir Slippfélagið. Þessi dökkblái er þar á meðal.

Veggir í lit

2018 var enginn maður með mönnum nema mála heimilið í hlýlegum lit. Fyrir nokkrum árum byrjaði þetta í gráum tónum en svo fóru litirnir að fara út í vínrauðan, brúnbleikan, svartan, millibláan, grágrænan og allt þar á milli.

Tengdar fréttir

Heimili

Jón Jónsson og Hafdís selja 182 milljóna einbýli

• Rakel og Pálmi Guðmunds selja lekkera íbúð á besta stað
• Stílhreint 105 fm einbýli í Kópavogi
• Arkitektahöll í Fossvogi með eftirsóknarverðum eiginleikum
• 5 sjarmerandi eignir sem kosta undir 55 milljónir

» Fleiri tengdar fréttir

• Blogga um frétt