Innanhússhönnuðurinn Bryndís Stella birgisdóttir, oftast kölluð Stella, og eiginmaður hennar Jakob Helgi Bjarnason hafa sett glæsilegt parhús sitt í Garðabæ á sölu. Eignin telur 273 fm og hefur verið innréttuð á einkar fallegan minimalískan máta.
Stella og Jakob Helgi voru áður búsett í sjarmerandi þakíbúð við Mýrargötu í Reykjavík, en þau settu íbúðina á sölu í maí 2022.
Vel hefur tekist til við hönnun hússins að utan og innan. Ragnar Ólafsson er arkitekt og aðalhönnuður hússins, en arkitekta- og innanhússhönnunarstudíóið Béton Studio, sem Stella rekur ásamt Hildi Árnadóttur arkitekt, sá um innanhússhönnunina.
Gengið er inn í opið og bjart alrými með stórum gluggum og góðri lofthæð. Eldhús og borðstofa eru samliggjandi í rýminu, en dökkt loft klætt með viðarklæddum hljóðplötum og viðarbitum gefa rýminu karakter og tóna fallega við stílhreina eldhúsinnréttingu.
Yfir eldhúseyjunni má sjá tvö formfögur hönnunarljós sem setja punktinn yfir i-ið. Í rýminu má einnig sjá stór listaverk á veggjum sem fanga augað.
Eignin státar af þremur svefnherbergjum og tveimur baðherbergjum. Ásett verð er 169,9 milljónir.