Arnar Dan Kristjánsson leikari og Sigríður Soffía Hafliðadóttir tónlistarkona hafa sett fallega íbúð sína í gamla Vesturbænum á sölu. Um er að ræða 164 fermetra eign á Ránargötu og er ásett verð 128 milljónir.
Hjónin hafa gert íbúðina upp og meðal annars tekið eldhúsið í gegn. Í eldhúsinu er nýleg blá innrétting frá HTH með kvartsteini. Útleiguherbergi í kjallaranum fylgir íbúðinni.
Tvær samliggjandi stofur eru í íbúðinni en sérstaka athygli vekur glæsilegur flygill í annarri þeirra. Sigríður Soffía greindi frá því í viðtali sem birtist á Smartlandi að flygillinn væri í uppáhaldi á heimilinu ásamt tungusófanum.
Sigríður Soffía er kórstjóri en hannaði um tíma vinsæl rúmföt. Eiginmaður hennar Arnar Dan hefur gert það gott sem leikari en greindi frá því fyrr í vetur að hann væri farinn að vinna á leikskóla sem hann sagði alveg stórkostlegt.