Píanóleikarinn Víkingur Heiðar Ólafsson hélt upp á fertugsafmælið sitt með tónleikum í Hörpu á miðvikudaginn þar sem hann flutti Goldberg-tilbrigði Johanns Sebastians Bachs.
Tónlistarunnendur og annað framafólk í samfélaginu flykktist á tónleikana. Á meðal gesta voru forsetahjónin Guðni Th. Jóhannesson og Eliza Reid. Ingibjörg Sólrún Gísladóttir, fyrrverandi ráðherra, lét sig heldur ekki vanta en hún mætti á tónleikana ásamt eiginmanni sínum, Hjörleifi Sveinbjörnssyni.
Víkingur Heiðar er á miklu tónleikaferðalagi þar sem hann flytur Goldberg-tilbrigðin 88 sinnum í mörgum af glæsilegustu tónleikahúsum heims. Víkingur Heiðar er að fylgja eftir útgáfu sinni á vegum þýska útgáfufyrirtækisins Deutsche Grammophon. Hann stígur tvívegis til viðbótar á svið í Eldborg á næstu dögum, eða næstkomandi föstudag og sunnudag.
Hér fyrir neðan má sjá stemninguna fyrir tónleikana í Hörpu.