Söngkonan Hera Björk Þórhallsdóttir er orðin löggiltur fasteignasali. Hún starfar á fasteignasölu Reykjavíkur og segist vera mjög spennt fyrir starfinu.
Hera Björk er ævintýrakona sem lætur ekkert stoppa sig. Eftir að hafa búið um tíma í Chile ákvað hún að venda kvæði sínu í kross og læra eitthvað nýtt. Hún fór því í að læra að vera fasteignasali en hún gerði líka fleira. Hún tók heilsu sína föstum tökum og hefur sjaldan verið sterkari og flottari en akkúrat núna.
„Ég hef verið í mjög mikilli „innivinnu“ undanfarin ár og þá mest frá því vorið 2017. Þá lenti ég aftur í því að sitja berrössuð á malbikinu og þá var það alfarið heilsutengt,“ segir Hera í viðtali við MAN í febrúar á þessu ári:
„Ég fylltist vonleysi yfir því að ég næði ekki tökum á sjálfri mér, bæði andlegri og líkamlegri heilsu minni. Ég segi að þetta hafi verið gott, maður þarf að lenda á þessum vegg, leka niður eftir honum og liggja svolítið grenjandi á gólfinu. Ég sá að ég þurfti að gera drastískar breytingar á mínu lífi og fór í þá vinnu. Ég þurfti að yfirvinna fordóma til að geta tekið næstu skref sem ég og gerði. Ég tók ábyrgð á sjálfri mér, heilsu minni, andlegri og líkamlegri,“ sagði hún jafnframt.