Meira er meira að mati Chanel fyrir jólin en hátíðarlína franska tískuhússins í ár nefnist Le Libre Maximalisme de Chanel. Innblástur förðunarlínunnar er sóttur í stjörnumerki Gabrielle Chanel, ljónið, og einkennast litirnir af djúpum gylltum og málmkenndum tónum.
Stjarna línunnar er án efa Le Lion de Chanel, gyllta ljómapúðrið með ljóni mótuðu á toppinn. Svo fallegt er púðrið að maður vill helst bara horfa á það en ekki snerta. Þeir sem taka þó af skarið og nota snyrtivörurnar munu horfa agndofa á spegilmynd sína og þann fallega ljóma sem endurspeglast á húðinni. Le Lion de Chanel kemur í takmörkuðu upplagi.
Innan línunnar má finna fjóra staka augnskugga með málmkenndri áferð sem eru með ljónsmerkinu mótuðu á toppinn. Chanel Ombre Premiére er langvarandi púðuraugnskuggi í litatónum sem ættu að henta flestum. Augnskuggarnir koma í takmörkuðu upplagi.
Chanel La Palette Caractére er palletta sem inniheldur fimm varaliti sem þú getur notað eina og sér eða blandað saman til að fá út þinn fullkomna lit. Varalitirnir koma í mismunandi áferðum: allt frá satíni yfir í mjög matta áferð.
Það þarf ekki að flækja hlutina. Chanel Rouge Allure Velvet í lit N°5 er hinn fullkomni rauði varalitur og ætti að vera í flestum snyrtiveskjum fyrir hátíðarnar. Til að auka enn á hátíðleikann eru umbúðirnar rauðar í stíl.
Chanel færir okkur hið klassíska rauða naglalakk til að para við varalitina og svo skemmtilega rauða og græna málmkennda formúlu fyrir þær sem vilja fara aðeins út fyrir hið hefðbundna.
Instagram: @Snyrtipenninn
Facebook: Snyrtipenninn