Það er um fátt annað rætt en þættina Tiger King þessa dagana. Aðalumfjöllunarefni þessara einstaklega áhugaverðu heimildarþátta er fyrrverandi dýragarðsvörðurinn Joseph Allen Maldonado-Passage, betur þekktur sem Joe Exotic.
Það má með sanni segja að Joe sé einstaklega litríkur karakter með einstakan smekk á fötum og fylgihlutum. Það fyrsta sem þú þarf til að stela stíl Joes er að klippa á þig „mullet“, það ætti að vera auðvelt í samkomubanni og værir þú að fara algjörlega eftir fyrirmælum Víðis Reynissonar. Það er ekki verra ef þú aflitar svo hárið, en það er þó ekki nauðsynlegt.
Næsta skref er að gera gat í augabrúnina og bæta við nokkrum í eyrun. Það getur þó reynst erfitt í samkomubanni. Tilraunastarfsemi með nál og epli gæti farið illa og ekki viljum við leggja meira á heilbrigðiskerfið á þessum fordæmalausu tímum.
Joe klæðist iðulega litríkum fötum. Þá eru litríkar pallíettuskyrtur áberandi í fatastíl hans og parar hann þær saman við klassískar gallabuxur. Svartar, bláar eða hvítar ættu að duga. Kúrekastígvél og -jakki setja svo punktinn yfir i-ið. Joe er líka einstaklega hrifinn af hverskyns flíkum með dýramynstri.
Leikarinn og tónlistarmaðurinn Jared Leto klæddi sig einmitt upp í anda Joe Exotic á dögunum með frábærri útkomu.