Knattspyrnudeild Víkings Ólafsvíkur hefur samið við spænska markmanninn Fran Marmolejo og mun hann spila með liðinu í sumar.
Hann kemur í stað landa síns Cristian Martínez sem gekk í raðir KA á dögunum. Marmolejo er þrítugur og lék hann síðast með Jönköping í Svíþjóð og var þar liðsfélagi Árna Vilhjálmssonar. Hann lék 4 leiki með liðinu í sænsku úrvalsdeildinni á síðasta tímabili.
Tímabilið 2010-2011 var hann varamarkvörður Málaga í efstu deildinni á Spáni.
„Víkingur Ó. lýsir yfir mikilli ánægju með að hafa náð samningum við leikmanninn og býður hann velkominn til félagsins,“ segir í tilkynningu sem félagið sendi frá sér í dag.