Gylfi Þór Sigurðsson ræddi við blaðamann mbl.is eftir 4:0-tapið gegn Frökkum á útivelli í undankeppni EM karla í fótbolta í kvöld. Erik Hamrén landsliðsþjálfari stillti upp fimm manna vörn og einum framherja í leiknum. 

„Það var ákveðið að spila með þrjá hafsenta í dag, þar sem við vissum að þeir yrðu mikið með boltann. Þeir eru góðir fram á við og með frábærar hreyfingar án boltans. Þeir spila boltanum vel á milli sín, en þetta gekk ekki alveg í dag,“ sagði Gylfi, sem var ekki of ósáttur við landsleikjahléið, þrátt fyrir tapið í kvöld. Ísland vann Andorra á föstudag og er því með þrjú stig eftir tvo leiki. 

„Það var skyldusigur á móti Andorra, en þegar við komum hingað bjóst enginn við að við myndum sækja einhver stig. Þetta er yfirburðarlið, ekki bara í riðlinum heldur í heiminum í dag. Við vissum að við þurftum að vinna Andorra og svo taka sex stig í sumar, það eru leikir sem við þurfum að vinna,“ sagði Gylfi og á þá við leiki við Tyrkland og Albaníu í byrjun júní á Laugardalsvelli. 

„Við þurfum að vinna Tyrkland og Albaníu heima og taka svo einhver stig af þeim úti. Þótt við töpuðum 4:0 í dag, þá tókum við þessi þrjú stig sem við áttum að taka. Við erum í ágætum málum ef við vinnum þessa leiki í sumar.“

Gylfi Þór virtist finna fyrir meiðslum fyrir leik, en þrátt fyrir það spilaði hann allan leikinn. „Ég var aldrei tæpur. Ég fékk högg í síðasta leik og verkurinn var ekki alveg farinn. Ég tók verkjatöflur, en síðan sáu adrenalínið og verkjatöflurnar um að ég kláraði leikinn,“ sagði Gylfi Þór. 

Tengdar fréttir

EM 2020

Þétt setið á ölhúsum meðan á leik stóð

• „Hjartað er báðum megin“
• Kolbeinn jafnaði markametið
• Leikur Englands stöðvaður í tvígang vegna kynþáttaníðs
• Stoltir af okkar fótbolta

» Fleiri tengdar fréttir

• Blogga um frétt