Átta liða úrslitin í Mjólkurbikarkeppni karla í knattspyrnu hefjast í kvöld þegar ÍBV og Víkingur eigast við á Hásteinsvellinum í Vestmannaeyjum þar sem flautað verður til leiks klukkan 18.
ÍBV sló ríkjandi bikarmeistara Stjörnunnar út í 32-liða úrslitunum og hafði betur gegn Fjölni í 16-liða úrslitunum. Víkingur lagði 4. deildar liðið KÁ að velli í 32-liða úrslitunum og hafði betur gegn KA í 16-liða úrslitunum þar sem úrslitin réðust í vítakeppni.
Eyjamenn, sem fögnuðu bikarmeistaratitlinum fyrir tveimur árum, sitja á botni Pepsi Max-deildarinnar þar sem þeir hafa aðeins unnið einn af níu leikjum sínum. Víkingar hafa verið að rétta úr kútnum í deildinni þar sem þeir hafa unnið tvo leiki í röð og eru í 9. sætinu. Liðin gerðu 1:1 jafntefli í deildinni í Eyjum fyrr í sumar.
Átta liða úrslitunum lýkur annað kvöld en þá eigast við FH og Grindavík, KR og Njarðvík og Breiðablik og Fylkir.