Fylkir hafði betur 2:1 gegn Grindavík í lokaleik 16. umferðar Pepsi Max-deildar karla í knattspyrnu í Árbænum í kvöld. Fylkir er í áttunda sæti með 22 stig en Grindavík í ellefta sæti með 17 stig.
Fylkismenn voru miklu beittari á upphafskafla leiksins og skoruðu tvívegis á fyrsta korterinu. Ragnar Bragi Sveinsson náði í vítaspyrnu eftir ágæt tilþrif strax á 4. mínútu og úr henni skoraði Geoffrey Castillion.
Á 15. mínútu skoraði Hákon Ingi Jónsson úr markteignum eftir góða fyrirgjöf Daða frá vinstri.
Daði lagði einnig upp fyrir Castillion á 11. mínútu með stungusendingu en Castillion skaut í slána.
Grindvíkingar náðu smám saman að stoppa aðeins betur í götin en sjaldgæft er að þeir gefi færi á sér eins og gerðist fyrsta korterið.
Í síðari hálfleik var leikurinn mjög daufur. Grindvíkingar voru mun meira með boltann eftir því sem á leið og þá bökkuðu Fylkismenn og gáfu eftir.
Mark Grindavíkur kom hins vegar ekki fyrr en á lokamínútu uppbótartímans og náði þar af leiðandi ekki að hleypa spennu í leikinn. Varamaðurinn Sigurjón Rúnarsson skallaði í netið af stuttu færi eftir fyrirgjöf Diego Diz frá hægri.