Þróttur og FH þurfa bæði einn sigur til viðbótar til að tryggja sér sæti í úrvalsdeild kvenna í fótbolta eftir sigra í kvöld, þrátt fyrir að fjórar umferðir séu eftir af deildinni. Þróttur mætir ÍA í næstu umferð og FH mætir grönnum sínum í Haukum.
Staðan, úrslit og næstu leikir í Inkasso-deild kvenna
Topplið Þróttar hafði betur gegn Aftureldingu á heimavelli, 2:0. Linda Líf Boama kom Þrótti yfir á 26. mínútu og Álfhildur Rósa Kjartansdóttir bætti við marki á 41. mínútu og þar við sat.
FH lenti í smá veseni með botnlið ÍR á útivelli, en vann að lokum 1:0-sigur. Birta Stefánsdóttir skoraði sigurmarkið á 51. mínútu. Marta Quental fékk beint rautt spjald hjá ÍR undir lokin.
Þróttur er í toppsætinu með 36 stig, FH í öðru sæti með 35 stig og svo Tindastóll í þriðja sæti með 25 stig.
Haukar unnu sinn þriðja leik í röð og sjötta af síðustu sjö er liðið vann sannfærandi 4:1-sigur á ÍA. Skagakonur komust yfir á 11. mínútu með marki Andreu Magnúsdóttur en Haukar svöruðu með þremur mörkum fyrir hlé og einu í byrjun seinni hálfleiks. Vienna Behnke gerði tvö þeirra og Sæunn Björnsdóttir og Kristín Fjóla Sigþórsdóttir skoruðu einnig.
Grindavík og Fjölnir mættust í Grindavík og lauk leiknum með 1:1-jafntefli. Birta Hallgrímsdóttir kom Grindavík yfir á 17. mínútu en Sara Montoro jafnaði á 61. mínútu.