Norska úrvalsdeildarliðið Brann er sagt hafa áhuga á að fá Rúnar Kristinsson, þjálfara nýkrýndra Íslandsmeistara KR, til liðs við sig en þetta kemur fram á vef Fréttablaðsins.
Rúnar hefur náð frábærum árangri með KR-liðið en undir hans stjórn hefur liðið þrisvar sinnum orðið Íslandsmeistari; 2011, 2013 og 2019 og bikarmeistari jafn oft; 2011, 2012 og 2014.
Rúnar hefur reynt fyrir sér í þjálfun erlendis, fyrst hjá norska liðinu Lilleström og síðan hjá belgíska liðinu Lokeren en var látinn taka pokann sinn hjá báðum félögum. Hann sneri aftur til KR fyrir tveimur árum.