Erik Hamrén, landsliðsþjálfari Íslands í knattspyrnu, ætlar sér að gera margar breytingar á byrjunarliði sínu fyrir vináttulandsleik Íslands og El Salvador sem fram fer í Kaliforníu í Bandaríkjunum í nótt. Ísland vann 1:0-sigur gegn Kanada í Kaliforníu í vináttulandsleik á fimmtudaginn síðasta þar sem fimm nýliðar fengu tækifæri en Hamrén ætla sér að hrista upp í liðinu.
„Það verða breytingar á byrjunarliðinu,“ sagði þjálfarinn í samtali við heimasíðu KSÍ í gær. „Markmiðið fyrir þessa ferð var að það myndi enginn leikmaður spila 90 mínútur í báðum leikjunum, nema kannski Hannes Þór Halldórsson. Það er mikilvægt að hrista upp í liðinu því leikmennirnir eru ekki tilbúnir í tvo heila leiki á þessum árstíma.“
„Við sáum það gegn Kanada að margir þeirra eru ekki einu sinni tilbúnir í heilan leik sem er eðlilegt því það er undirbúningstímabil hjá flestum leikmönnum liðsins í dag. Markmiðið með þessari ferð var einnig að skoða þá leikmenn sem við völdum í hópinn og við viljum sjá hvernig allir leikmenn liðsins standa sig,“ bætti þjálfarinn lið.
Alls voru átta nýliðar valdir í landsliðshópinn fyrir leikina tvo gegn Kanada og El Salvador. Fimm fengu tækifæri gegn Kanada, þeir Daníel Leó Grétarsson, Höskuldur Gunnlaugsson, Stefán Teitur Þórðarson, Alfons Sampsted og Bjarni Mark Antonsson. Ari Leifsson, Oskar Tor Sverrisson og markmaðurinn Elías Rafn Ólafsson gætu því fengið tækifæri í nótt.
Leikur Íslands og El Salvador hefst á miðnætti að íslenskum tíma og verður í beinni textalýsingu á mbl.is.