Framarar hafa fengið miðjumanninn Tryggva Snæ Geirsson að láni frá KR út leiktíðina og mun hann því spila í Safamýrinni í Lengjudeildinni í sumar.
Tryggvi er uppalinn Framari og félaginu því kunnugur en hann verður tvítugur á árinu. Hann lék með KV í 3. deildinni á síðasta ári og hefur spilað einn leik í efstu deild með KR, sumarið 2018.
Framarar hafa fengið nokkra leikmenn til liðs við sig fyrir átökin í sumar og ber helst að nefna þá Aron Kára Aðalsteinsson, Albert Hafsteinsson, Alexander Má Þorláksson, Ólaf Íshólm Ólafsson og Þórir Guðjónsson. Fram hefur leikið í fyrstu deild undanfarin fimm sumur eða síðan liðið féll úr efstu deild 2014.