Um 2.500 stelpur á aldrinum sex til tólf ára eru nú samankomnar á Símamóti Breiðabliks sem fram fer í Kópavogi á íþróttasvæði Breiðabliks en mótið hófst með látum með skrúðgöngu á fimmtudaginn síðasta.
Leikjadagskrá hófst formlega í gær en Símamótið var fyrst haldið árið 1985. Þetta er því í 36. sinn sem mótið er haldið en óvíst var hvort hægt var að halda mótið fyrr í vetur vegna kórónuveirufaraldursins.
„Þetta hefur gengið ótrúlega vel,“ sagði Sigurður Hlíðar Rúnarsson, deildarstjóri hjá knattspyrnudeild Breiðabliks, í samtali við mbl.is í dag en Sigurður er einn af þeim sem hefur séð um að skipuleggja mótahald Símamótsins.
„Við erum heppin að vera með stórt svæði til umráða og það hefur gengið vel að dreifa leikjum og fólki á svæðin. Foreldar hafa verið til fyrirmyndar að hlýða Víði í einu og öllu og við erum gríðarlega sátt með alla sem koma að mótinu,“ bætti Sigurður við í samtali við mbl.is.