Kristófer Páll Viðarsson knattspyrnumaður frá Fáskrúðsfirði hefur snúið aftur til Keflavíkur frá uppeldisfélaginu Leikni F. þar sem hann hefur verið að láni undanfarnar vikur.
Kristófer skoraði grimmt fyrir Leikni á árunum 2014 til 2016 og gerði tíu mörk fyrir liðið þegar það hélt sér óvænt í 1. deildinni 2016. Hann hefur síðan leikið með Fylki, Selfossi og síðast Keflavík en missti alveg af síðasta tímabili vegna meiðsla.
Hann var svo lánaður til Leiknismanna í sumar og spilaði fimm leiki með þeim en er nú kominn aftur til Keflavíkur sem hefur kallað hann til baka. Keflavík seldi kantmanninn Adam Ægi Pálsson til Víkinga úr Reykjavík í vikunni og verður Kristófer væntanlega ætlað að fylla skarð hans.