Sigurður Gísli Bond Snorrason, fyrrverandi leikmaður Aftureldingar í knattspyrnu, veðjaði á hundruð knattspyrnuleikja hér á landi síðasta sumar, þar á meðal fimm leiki hjá sínu eigin liði. Tók hann þátt í fjórum af þeim fimm leikjum.
Heimildin greinir frá þessu.
Í reglugerð Knattspyrnusambands Íslands, KSÍ, um knattspyrnumót segir að leikmönnum sem taka þátt í knattspyrnuleikjum á vegum sambandsins sé óheimilt að taka þátt í veðmálastarfsemi í tengslum við eigin leiki og mót.
Öllum knattspyrnumönnum sem eru samkvæmt stöðluðum samningi KSÍ samningsbundnir íslenskum liðum er þá óheimilt að veðja á leiki í íslenska boltanum. Slíkan samning var Sigurður Gísli með hjá Aftureldingu.
Veðjaði hann aftur á móti á hundruði leikja í hinum ýmsu deildum og flokkum á Íslandi og því allt útlit fyrir að Sigurður Gísli hafi þverbrotið reglur sambandsins.
Aga- og úrskurðarnefnd KSÍ er með mál Sigurðar Gísla til meðferðar eftir að Klara Bjartmarz, framkvæmdastjóri sambandsins, vísaði því þangað, samkvæmt umfjöllun Heimildarinnar.