Hollenski miðjumaðurinn Frenkie De Jong getur ekki tekið þátt á EM vegna ökklameiðsla. Ronald Koeman, þjálfari Hollands, segir Barcelona hafa tekið óþarfa áhættu með heilsu leikmannsins.
„Við tókum ákvörðunina í dag. Við teljum Frenkie De Jong ekki í standi til að spila næstu þrjár vikurnar. Hann á sögu af meiðslum í hægri ökkla og það er ekki sniðugt að taka áhættu. Félagsliðið hans tók áhættu og við þurfum að súpa seyðið af því“. Sagði Koeman á blaðamannafundi fyrir leik Íslands og Hollands í gær.
Koeman var sem leikmaður mikil goðsögn hjá Barcelona og stýrði liðinu tímabilið 2020 til 2021.
De Jong tók ekki þátt í leiknum í Rotterdam í gær en vonir stóðu til þar til í gær að hann gæti tekið þátt á EM. Fyrsti leikur Hollands er gegn Pólverjum á sunnudaginn.