Alan Smith, fyrrverandi leikmaður enska fótboltaliðsins Arsenal og núverandi sjónvarpsmaður á Sky Sports, segir það koma til greina hjá Arsenal að selja framherjann Alexandre Lacazette eftir aðeins eitt tímabil hjá félaginu.
Lacazette var um tíma dýrasti leikmaðurinn í sögu Arsenal, en félagið borgaði Lyon 46,5 milljónir punda fyrir þjónustu hans. Framherjinn skoraði 129 mörk fyrir Lyon, en það hefur gengið illa að finna netmöskvana á Englandi, eins og níu mörk í 29 leikjum gefa til kynna.
„Hann er kannski ekki leikmaðurinn sem Arsenal hélt hann væri. Hann byrjaði ágætlega, en það er hægt að vera mjög góður í Frakklandi, en ekki ná sér á strik á Englandi. Fleiri leikmenn hafa komið frá Frakklandi og ekki náð sér á strik með Arsenal. Það gæti farið svo að félagið selji hann,“ sagði Smith.