José Mourinho, knattspyrnustjóri Manchester United, er ánægður með nýjasta leikmann liðsins, Diogo Dalot. Dalot gekk til liðs við United fyrr í dag fyrir 19 milljónir punda en hann kemur til félagsins frá Porto í Portúgal þar sem hann er uppalinn.
„Hann er besti bakvörðurinn í Evrópu í dag í sínum aldursflokki,“ sagði Mourinho. „Hann er gríðarlega hæfileikaríkur varnarmaður og það vantar ekki mikið upp á hjá honum svo hann geti orðið frábær leikmaður fyrir þetta félag.“
„Hann er líkamlega sterkur, gáfaður á velli og tæknilega góður. Hann er mjög vel þjálfaður enda alinn upp hjá Porto sem hefur framleitt frábæra leikmenn í gegnum tíðina. Ég hlakka mikið til að byrja að vinna með honum,“ sagði Portúgalinn að lokum.